مسلسلات رمضانية نجحت جدا و أتعلقنا بيها لدرجة إننا لسة بنعيدها لحد دلوقتي.

-١-

المسلسل صاحب أشهر فرح فى التاريخ

مسلسل لن أعيش فى جلباب أبى

مفاجأة: جزء ثانٍ من مسلسل " لن أعيش في جلباب أبي" فمن يقدّم شخصية نور  الشريف؟ | مجلة سيدتي

طبعا معظمنا عارف المسلسل و فرح سنية العمره ما فشل أنه يضحكنا ده غير كمان ميمز عبلة كامل اللي متتنسيش

بس اللي ممكن يكون كتيير مش عرفينه إن المسلسل ده كان أصلا رواية ل إحسان عبد القدوس و بعدين حولوها لمسلسل.

المسلسل ده قريب جدا من قلوبنا ، بيحسسنا بالدفا والأمان و فى نفس الوقت بيفطسنا من الضحك و مبنشبعش منه أبدا .

و للى ماشفهوش ، المسلسل بيحكي عن راجل غلبان اسمه عبد الغفور البرعى (نور الشريف) كان شغال صبي عند الحج سردينه (عبد الرحمن أبو زهرة) فى وكالة البلح بس كان ناصح و ب نصاحته عرف بعد ما كان صبى يبقى أشهر معلم فى الوكالة – قصة كفاح- ، و لما ظروفه أتحسنت اتجوز حب عمره فاطمة  (عبلة كامل) و خلف منها   ٣بنات و ولد اسمه عبد الوهاب (محمد رياض) بس للاسف الولد ده كان بيعانى من عقدة “لن أعيش فى جلباب أبى” ، فيا ترا هيحصل ايه و هل العقدة دى هتتحل ؟!

المسلسل مكون من ٣٦ حلقة ، أخد جائزه أحسن مسلسل في رمضان ١٩٩٦ ، بطولة نور الشريف ، عبلة كامل ، محمد رياض ، حنان ترك ، وفاق صادق ، منال سلامة و فنانين تانين كتيير

 موسيقى تصويرية حسن أبو السعود ، تأليف إحسان عبد القدوس و سيناريو مصطفى محرم و إخراج أحمد توفيق و تقييمه على IMDb 8.2.

-٢-

مسلسل كوميدى ساخر بيناقش قضية مؤسفة فى المجتمع

مشاهدة مسلسل عايزة أتجوز

كانت قالت مرة النجمة الجميلة هند صبرى فى أحد لقاءاتها، إن أفضل طريقة ممكن توصل بيها رسالة ل بنى ادم هي “الضحك” و فعلا المسلسل ده ضحك ناس كتير و لسة لحد دلوقتي بيتاخد منه ميمز و إستكرز بس ناقش برده بطريقة كوميدية مشكلة بتعانى منها كتير من بنات المجتمع المصرى لحد النهاردة ، مشكلة ضغط المجتمع على البنت للجواز الضغط اللي بيوصلها لمرحلة إنها ممكن تتجوز اي حد و أول من يخبط على الباب ل مجرد إنها خايفة من اللقب الوهمى اللي ألفه المجتمع “العنوسة” ، و بتدخل فى مرحلة المنافسة ، صحبتك على كتفها عيلين و بنت عمتك على كتفها تلاتة و مقارنات ملهاش أدنى شئ من المعنى

عميق أوى الكلام ده صح؟ ،

ميزة المسلسل ده إنه بيدخلك الفكرة العميقة دى بسلاسة شديدة من غير ما تزهق أو تمل  عن طريق دكتورة صيدلانية اسمها علا عبد الصبور (هند صبرى) و مامتها سهير (سوسن بدر) اللي بتدورلها على عريس و هتموت و تجوزها ، و فى كل حلقة هيكون فى عريس جديد بيتقدم لعلا و بيكون ضيف الحلقة مع الابطال الرئيسية للمسلسل ف يا ترا فى الاخر ، ايه اللي هيحصل لعلا و هل مشكلتها  هتتحل و تلاقي العريس المناسب ؟ 

أتعمل من المسلسل ده بعد ١٢ سنة نسخة تانية بشكل مختلف تماما اسمها “البحث عن علا” بتناقش إطار جديد من المشكلات بطريقة جديده و إحنا عملناه ريفيو قبل كدة لو حبين ترجعوله و تفهموا الموضوع أكتر 

“عايزة أتجوز” مكون من ٣٠ حلقة ، بطولة هند صبرى ، سوسن بدر ، أحمد فؤاد سليم ، رجاء حسين ، كارولين خليل ، طارق الإبيارى و فنانين تانين كتير ، تأليف غادة عبد العال ، إخراج رامى إمام و تقييمه على IMDb 7.2 .

-٣-

مسلسل عرفنا على كلمة جديدة نفسنا تتقلنا كلنا و هي “هاى شوجر”

مسلسل ب ١٠٠ وش

مسلسل بـ100 وش الحلقة 30 والاخيرة HD اون لاين

المسلسل ده كان إنطلاقة لممثلين موهوببن بقوا نجوم دلوقتي و كان برده نوع جديد على نجوم ليهم اسمهم فى الساحة الفنية ، و منقدرش ننكر إنه هون شوية علينا الأيام المريرة اللي عشناها فى رمضان مع الكورونا و الكوارنتين و لسة لحد دلوقتي بنشير الميمز و الاستيكرز بتاعته !

المسلسل بيحكى عن سكر  (نيلى كريم) اللي كانت نصابة محترفة بس ما يقع إلا الشاطر ، أتنصب عليها من نصاب محترف اللي هو عمر (آسر يسين) و هتحاول سكر ترجع  فلوسها و هيدخلوا فى صراعات كوميدية مع بعض بعدين هيتحدوا بعض ان واحد منهم يجيب فريقه و هيعملوا شبكة نصب كبيرة ، لو لسة مشفتوش المسلسل و عايزين تعيشوا معاهم مغامرتهم الكوميدية العظيمة فى النصب و الاحتيال و خصوصا “أم معاز”،  أتفرج على المسلسل و مش هتندم ! 

ب ١٠٠ وش مكون من ٣٠ حلقة بطولة نيلى كريم ، آسر ياسين ،  زينب غريب ، إسلام إبراهيم ، حسن أبو الروس ، علا رشدى ، شريف الدسوقى ، مصطفى درويش ، دينا ماهر و فنانين تانيين كتير ، تأليف أحمد وائل و عمرو الدالى ، إنتاج العدل الجروب ، إخراج المخرجة القديرة كاملة أبو ذكرى و تقييمه على IMDb 8.2 .

-٤-

مسلسل أتشهر بجملة كدة أول ما بنسمعها بنفتكره على طول “جزرة و جطمها جحش” ،

ايوة ، زي ما جيه بالك بالظبط !

مسلسل الكبير أوى

مسلسلات رمضان 2022.. تفاصيل مسلسل "الكبير أوي" الجزء السادس

المسلسل ده له طابع خاص عند كتير من المصريين ، كان لفترة من الفترات علامة من علمات رمضان بأجزائه الخمسة و خصوصا الأجزاء الأولى ، كان فى كتير من الناس يا بيفطروا يا بيتسحروا عليه ، له نوع تانى كدة من الكوميديا و الأفيهات مش بنلاقيها فى المسلسلات الكوميدية التانية ، و لحد دلوقتي لو لقيناه فى التليفزيون ممكن نسيبه و نتفرج عليه عشان نضحك شوية ، و برده لسه بنستعمل الأفيهات بتاعته فى ميمز و ستيكرز ، و أكتر مشهد منتشر منه دلوقتي مشهد “هدية ” و “هدرس ” و هما بيتناقشوا فى الطرق الجبارة للعناية بالبشرة . 

المسلسل بيحكى عن الكبير أوى ، عمدة المظريطة ، كان قاعد لا بيه ولا عليه ، و أكتشف فجأة أن ليه أخ توأم (سى جونى) جى من أمريكا و بدأت صراعات كوميدية بينهم ، صراع مظريطى أمريكى أصيل ، بعدين هيظرلهم بقا أخوهم التحفة أبو شعر برتقانى (حزلقوم) و هتتوالى أحداث أعجب ما يكون .

الكبير أوى أتعمل منه خمس أجزاء و الجزء السادس هيشارك فى السباق الرمضانى السنة دي ، بطولة أحمد مكى ، دنيا سمير غانم ، هشام إسماعيل ، ليلى عز العرب ، بيومى فؤاد ،محمد سلام و فنانين تانين كتير ، رحلة كوميدية بدأت سنة ٢٠١٠ و لسة مكملة معانا لحد دلوقتي .

-٥-

المسلسل ده أكتر كومنت أتقال عليه إنه بيبقى أحلى ٤٥ دقيقة فى اليوم ، بيوديك لحتة تانية كدة ،

مسلسل خلى بالك من زيزى

النقاد يشيدون بمسلسل خلي بالك من زيزي - بوابة الشروق - نسخة الموبايل

المسلسل الرايق اللي اضحكنا و ابكانا على مدار حلقاته  و فى نفس الوقت وصلنا رسالة مهمة بشكل كوميدى سلس يخش القلب

خلى بالك من زيزى ناقش حاجة مهمة جدا كان كتيير من الناس مبيعرفوش إنها عندهم أو عند أطفالهم و مكانوش عارفين يتعملوا معاها إزاى ،

 الADHD

الADHD دى مشكلة فعلا بتواجه ناس كتيير و بيترجموها على إنها تشتت حركي زيادة أو عصبية و بيحصلهم مشاكل بسببها و الناس بتطلع عليهم أحكام و أنطباعات و هما حقيقى ملهمش أى زنب ، هما بس متعلموش يتعملوا معاها ازاي  .

المسلسل جسد المشكلة فى شخصيتين ، زيزى (أمينة خليل) و الطفلة تيتو(ريم عبد القادر) اللي عندهم ADHD و دى كانت حركة ذكية فى السيناريو لأن الموضوع اتناقش من النحيتين

 ده غير كمان إنه عرض مشاكل بتحصل فى العلاقات بيبقى مش عارفين نحلها إزاى و عرض حلول ليها بشكل راقى و متحضر فقدينه فى المجتمع 

بس الحقيقى مميز فى خلى بالك من زيزى و قرب الناس من المسلسل هو الحوار ، السيناريو فعلا فى بعض المشاهد كان بيشرح مشاعر بنحس بيها بس مبنقدرش نعبر عنها بالشكل الصح و ناس كتيرة حست إنها متعلقة بقصة من القصص العرضها المسلسل .

خلى بالك من زيزى بطولة أمينة خليل ، محمد ممدوح ، على قاسم ، بيومى فؤاد ، صفاء الطوخى ، سلوى محمد على ، نهى عابدين ، أسماء جلال ، على الطيب و فنانين تانين كتير ، تأليف مريم نعوم و إخراج كريم الشناوى .

Leave a Reply

Your email address will not be published. Required fields are marked *

%d bloggers like this: