بعد أول حلقات من مسلسل (مين قال؟) ..ده رأينا

أحمد داش في صراع مع والده بسبب نتيجة الثانوية العامة في (مين قال)
المسلسل بدأ في عالم شريف (احمد داش) طالب في ثانويه عامه والمهتم بمجال إدارة الأعمال، و بنتعرف على اسرة شريف اللي مكونه من اب و ام مستنين بفارغ الصبر النتيجة اللي هتدخل ابنهم كلية هندسة، لكن في نفس الوقت بنشوف شريف مهتم ببيع منتجات على الإنترنت و مش في دماغه النتيجه اصلا.


شريف بيرجع بيته بيلاقي احتفال كبير و تهاني من اهله عشان مجموعه سمح فعلا انه يدخل كليه هندسه في جامعه خاصه، ولكن بيفاجئهم إنه عايز يدخل كلية إداره الأعمال وانه عمره ما كان عايز هندسه! و بيدور نقاش بينه و بين والده (جمال سليمان) و بينتهي بإجبار (شريف) يقفل الصفحه اللي بيبيع عليها منتجات و بيمارس من خلالها هوايته.


لكن شريف فضل عنده امل انه يقنع والده بمجال إدارة الأعمال، وفعلا شريف افتكر انه نجح في اقناع والده وانتهى النقاش بينهم بأن والده بيحاول يختارله الطريق الصح لكن عمره ما هيجبره على الطريق ده ، شريف رجع البيت و لقى انه فشل في اقناع والده لأنه لقى والده اشترى له ادوات كليه هندسة و كمان بدأ في دفع مصاريف الجامعه. يا ترا شريف هيتعامل ازاي مع ضغط والده المستمر؟ هيستسلم و يعمل اللي والده عايزه؟ ولا هيمشي ورا حلمه في مجال اداره الاعمال؟


المسلسل بيناقش قضيه بيعاني منها كل الشباب اللي في سن (شريف) ومشاكلهم مع آبائهم و تحقيق احلامهم اللي ممكن تكون غريبه عن آبائهم، و ده غير ظهور اكتر من قصه واقعيه لاكتر من شاب صحاب (شريف)؛ فمن مميزات المسلسل ظهور وجوه جديدة كتير جدا و لو عايز تعرف اكتر عن الوجوه الجديده اللي ظهرت في رمضان استنى مقالنا عنهم!
 

Leave a Reply

Your email address will not be published. Required fields are marked *

%d bloggers like this: