اتفرجت على كل المسلسلات و الافلام الانجليش و العربى و زهقت، مفيش جديد، مليت من الواتش ليست بتاعتك و عايز نوع جديد تتفرج عليه، هنحللك المشكلة دى، كلنا عارفين طبعا إن فترة السبيعنات و التمنينات كانت من الفترات الفريدة فى مصر خصوصا بعد حرب أكتوبر و اتعرض فيها اعمال مميزة جدا من حيث القصة و التمثيل و الاداء، و عشان كدة، هنقترح عليك بعض الافلام الاتعرضت فترة السبيعنات و متتفوتش !
١. أفواه و أرانب
فيلم أفواه و أرناب فيلم إجتماعى رومانسى ناقش مشكلة من أخطر المشاكل البيواجهها المجتمع، كثرة الإنجاب ، الفيلم بطولة فاتن حمامة و محمود يسين و إخراج هينرى براكات ، اتعرض سنة ١٩٧٧ و بيحكى عن نعمة (فاتن حمامة) ، بنت غلبانة من الريف بتسعى وراء أكل عيشها هى و اختها المخلفة عيال كتير و جوزها ، من شدة الحاجة جوز اختها قرر يجوزها لراجل بتاع فراخ للمصلحة و نعمة كانت رافضة الجوازة دى تماما فهتهرب و النصيب هيجمعها بمحمود بيه (محمود يسين) و من هنا حياتها هتتغير تماما ، فيا ترا هيحصل ايه و ايه هتكون رحلة نعمة ؟ اتفرجوا على الفيلم عشان تعرفوا و تعيشوا رحلتها٠٠٠
٢.الحفيد
فيلم الحفيد يعتبر جزء تانى لفيلم أم العروسة الكان بطولة تحية كريوكا و عماد حمدى و سميرة احمد و يوسف شعبان و حسن يوسف و غيرهم من الفنانين القديرين ، الفيلم بطولة ميرفت أمين، نور الشريف، كريمة مختار، محمود عبد العزيز و غيرهم من عظماء الفنانين و إخراج عاطف سالم. الحفيد فيلم إجتماعى كوميدى أتعرض سنة ١٩٧٤ بيحكى عن اسرة متكونة من سبع ابناء ، كل واحد و مشاكله باختلاف العمر و الاجيال البيجمعها بيت واحد و أبرزهم مشكلة نبيلة (ميرفت أمين) اللسة عروسة جديدة و جوزها (نور الشريف) بيؤيد مبدأ إن الخلفة تتأجل فى بداية الجواز بس نبيلة هتكتشف إنها حامل ، فيا ترا جوزها هيكون رد فعله ايه و هيتعامل مع الموقف ده ايزاى و ايه هى المشاكل الهتواجه باقى الابناء؟ اتفرجوا على الفيلم عشان تعرفوا و تعيشوا معاهم حياتهم اليومية٠٠٠
٣.أريد حلا
فيلم أريد حلا فيلم يعتبر من الافلام المؤثرة فى تاريخ السينما و هو واخد المرتبة ال٢١ فى قائمة أفضل مئة فيلم فى تاريخ السينما المصرية ، أتعرض سنة ١٩٧٥، الفيلم حرفيا كان بيبعبر عن صرخة ألم بتتعرضلها ستات كتير و لسة للاسف الستات بتعانى منها لحد النهاردة ، أريد حلا ساهم فى إعادة النظر فى بعض القوانين البتخص واحدة من القضايا الشائكة البتعانى منها الستات فى المجتمع و هى حقوق الست عند الطلاق، الفيلم بطولة فاتن حمامة، رشدى أباظة، ليلى طاهر، أمينة رزق و إخراج سعيد مرزوق و بيحكى عن درية (فاتن حمامة) الحياتها الزوجية بقت مستحيلة مع مدحت(رشدى أباظة) البيشتغل فى السلك الدبلوماسى و بتطلب منه الطلاق لكن مدحت بيرفض و بتدخل درية فى دوامة و متاهة القضايا و المحاكم باحثة عن حل ، فهل هتلاقيه؟ اتفرجوا على الفيلم و انتوا هتعرفوا٠٠٠
٤.فيلم شروق و غروب
لو ملكش فى الرومنسى ولا الكوميدى ولا الاجتماعى فالفيلم ده ليك ،فيلم شروق و غروب من أقوى الافلام السياسية الاتعملت فى الفترة دى ، أتعرض سنة ١٩٧٠ ، بطولة سعاد حسنى، رشدى أباظة، صلاح ذو الفقار، محمود المليجى و غيرهم من الفنانين العظماء و إخراج كمال الشيخ، الفيلم بتدور احداثة بعد حريق القاهرة سنة ١٩٥٢ و بيحكى عن مديحة (سعاد حسنى) ، بنت رجل فى منصب مهم(محمود المليجى) الكانت مستهترة ، و كل شوية بتتجوز و بتطلق و حياتها مش مستقرة على الاطلاق، اتجوزت سمير و كانت شخصيته ضعيفة قدام ابوها و كانت حاسة معاه بالملل فجمعها القدر بعصام(رشدى أباظة) صاحب سمير جوزها و كانت هتخونه مع عصام و اكتشف سمير الموضوع بابشع الطرق، يا ترى هيحصل ايه لمديحة و سمير هيتصرف ايزاى و ايه مصير مدحت و ايزاى الاحداث هتاخد مسار سياسى؟ اتفرجوا على الفيلم و انتوا هتعيشوا قصتهم المليانة إثارة و تشويق!٠
٥.البحث عن فضيخة
لو يومك كان تقيل و عايز تنهيه بضحكتين و ابتسامه يبقى عليك و على فيلم عادل إمام ، البحث عن فضيحة ، الفيلم بطولة عادل إمام، ميرفت أمين و سمير صبرى و غيرهم من عظماء الفنانين و إخراج نيازى مصطفى ، الفيلم بيحكى عن باش مهندس مجدى(عادل إمام) المن الصعيد و بيستلم وظيفته الجديدة فى القاهرة و بيوصيه ابوه قبل ما يسافر إنه يتحوز بنت حلوة من مصر لتحسين نسل العيلة ، بيدور الفيلم فى إطار كوميدى فى رحلة البحث عن العروسة المثالية لمجدى و بيساعدة سامى(سمير صبرى) العنده خبرة كبيرة مع البنات إنه يلاقيها بناصيحة الجهنمية، و فعلا مجدى هيلاقى فتاة احلامه المثالية فى حنان(ميرفت أمين) و هيعمل ال لا يعمل عشان يوصل لحنان لدرجة البحث عن فضيحة ! فيا ترا هيوصل لحنان ايزاى ؟ و هل هيتجوزها ؟ اتفرجوا على الفيلم و انتوا هتفطسوا من الضحك و تعرفوا٠٠٠
.