مساجد مصرية أثرية مشهورة ممكن توزورها فى رمضان 5

شهر رمضان معروف عنه إنه شهر الخير والكرم و بيكون مليان بالراحة النفسية و الاجواء الرمضانية اللي بترسم على وشنا البهجة و السعادة. 

هل يا ترى نفسك تعمل حاجة مختلفة فى رمضان معملتهاش قبل كده !!؟

لو نفسك ، متفكرش كتير ، جبنالك ٥ مساجد ممكن تزورها كشيء مختلف معملتوش قبل كده فى الشهر الكريم مع أصحابك فتاخدوا ثواب و فى نفس الوقت تكونوا استمتعتوا بالجمال المعماري للمساجد دى٠

مسجد عمرو بن العاص

لو متعرفش فمسجد عمرو بن العاص  تم اخيرا افتتاحه من كام يوم بعد ترميم استمر لفترة طويلة و دلوقتى جاهز لاستقبال الزوار للصلاة والزيارة . المسجد موجود فى مصر القديمة فى محيط مجمع الأديان وهو أول مسجد اتبنى بعد دخول عمرو بن العاص لفتح مصر و تم تلقيبه بأسماء كتير منها مسجد الفتح وتاج الجوامع٠

مسجد ابن طولون

مسجد ابن طولون هو مسجد محتفظ  بشكله الأثرى إلى يومنا هذا و ملامحه متجددتش زى بعض المساجد بسبب التجديدات الاتعملت فيها ، بالعكس ، أنت هتشوفه بالطراز العباسي الاتبنى عليه بالظبط ، هو ثالث مسجد اتبنى فى العاصمة بأمر من أحمد ابن طولون اللى أسس الدولة الطولونية و المسجد موجود فى ميدان أحمد ابن طولون فى حى السيدة زينب٠

مسجد الحاكم بأمر الله

مسجد الحاكم بأمر الله هو ثاني أقدم مسجد فاطمي موجود فى القاهرة مشهور جدا بمآذنه المميزة و مئذنته الرئيسية هي من أقدم مآذن العاصمة والأمر ببنائه كان الخليفة العزيز بالله الفاطمى و الكمل بنائه من بعده كان الحاكم بأمر الله و اتسمى على اسمه والمسجد موجود فى الجملية في المعز لدين الله الفاطمى ، ممكن تصلى صلاة التراويح هناك وبعدين تطلع أنت و أصحابك على المعز تتسحروا وتمشوا و تستمتعوا بشارع المعز الساحر٠

مسجد محمد على

مسجد محمد على و سموه برده مسجد المرمر و مسجد الألبستر لأنهم استخدموا كمية كبيرة من النوع ده من الرخام و هم بينشأوا المسجد اللى اتبنى على الطراز العثماني في قلعة محمد على  و ممكن بعد ما تصلي فيه و تتأمل جماله المعماري ، تتفرج على قلعة محمد على الخلابة ٠

المسجد الأزهر

المسجد الأزهر هو من أهم المساجد مش بس فى مصر لكن فى العالم الإسلامى ككل، إنشائه يعود لبداية الدولة الفاطمية فى مصر لما فتحها جوهر الصقلى ، المسجد ده كمان يعتبر من أهم المساجد و الأماكن التاريخية الكان ليها دور كبير في نشر الإسلام للعالم كله٠

Leave a Reply

%d