ايزاى تعرف أنت فى علاقة سامة ولا لا ؟
مبدئيا العلاقة السامة فى ناس كتير جدا فهمنها غلط ، فاهمين إنها لازم تكون بين ولد و بنت و الولد هو الوحش ، سيناريو متكرر يعنى ، لكن لا !أحنا إى علاقة فى حياتنا ممكن تكون سامة ، علاقتنا بأهلنا ، بأصحابنا أو حتى بنفسنا و ده حقيقى أخطر نوع ، أنك تكون بتسم نفسك و أفكارك و أنت مش مدرك ده .ثانيا بعيدا عن علاقات الأهل و العلاقات البنتولد نلاقيها ، لازم تجاوب نفسك على سؤال مهم أوى ! أنا بدخل الشخص ده حياتى ليه ؟ ليه بقرر أنى أدخل فى علاقة جديدة ؟ هل هو أحتياج ولا أقتناع ولا ملل ولا وحدة…ألخ
فى أسباب كتيير بس المهم تكون مقنعة مش الهو كدة و خلاص ! لأنه ده معناه أن العلاقة مش هيكون ليها معنى ! ولازم تكون صريح مع نفسك لأن ممكن أنت التكون الجانى مش الضحية بمعنى أنك أنت السام مش هم !ندخل فى الموضوع
١) عدم الأمان و الراحة
دلؤتى أول شرط من شروط العلاقات و لو مش موجود مش محتاجة تحاول فى الموضوع أصلا أكتر من كدة ، الراحة و الأمان ، أحنا مش بندخل علاقات حياتنا عشان تبئى أصعب ، هى صعبة أصلا ، أحنا بندخل ناس حياتنا عشان تخليها أسهل و ألطف و تطمنا ، مقلتش أن مفيش خناق و مفيش خلاف ، ربنا خلقنا مختلفين و أختلافنا سر قوتنا ، بس فى فرق بين الخلاف و بين حد أرفك فى عيشتك ، ٢٤ ساعة خناق و عكننة و نكد و مفيش تفاهم ولا أمان و حاسس أن العلاقة مهددة بالأنهيار و فى وقت هتقع و على طول قلقان و مش واثق الطرف التانى متمسك بيك ولا لا و متقلش و أنا أعرف إيزاى ، لا ، أنت بتبئى عارف و ساكت لمجرد فكرة أنك خايف متلاقيش غيره / غيرها
٢)السيطرة
لما حد يكون عايز يسيطر عليك ، يخليك لعبة فى إيده ، يجيبك وقت ما هو عايز و يوديك وقت ما هو عايز ، و أنت تكون مسلوب الإرادة و الحرية و الفكر ، من الأخر ، لاغى شخصيتك ، بجد بالذات البنات بتنجذب للنوع ده جدا و مبتبئاش حاسة ، ألبسى متلسيش ، أخرجى متخرجيش ، تشتغلى ده لا سيبيه ، لا مفيش شغل أصلا ، محدش يقلك تعملى ايه عشان أنتى مش طفلة !! و كمان المشكلة دى ساعات كتيير بتكون مع الأهل ! فى فرق بين النصيحة و النقاش و يا تقنعنى يا أقنعك و بين الهو كدة ! أنت مسئول / مسئولة منى و هو كدة ! ده مش لائى مبرر ، عايزة فكرة السيطرة و خلاص لمجرد السيطرة ! ده هيخليك تحس أنك ضعيف ، ملكش قيمة ولا لازمة و مع الوقت هيحسسك أنه أكسير الحياة و الحياة يا بيه يا بلاها ، و يخليك تتنازل تتنازل تتنازل لحد ما تخسر كل حاجة و تقول يا ريت الجرا ما كان ! أهم حاجة فى النوع ده لو مع “الأهل” النقاش و الصبر و النفس الطويل و الهدوء ! أما لو مع حد تانى ملهاش لازمة
٣)الأثر السلبى
مفيش علاقة صحيحة هتسيب أثر سلبى فيك ! يعنى ايه ؟يعنى متخليش أى علاقة مهما كانت تغير فى مبادئك ، فى أخلاقك ، فى قناعاتك ، قناعاتك كنز و حافظ عليه ، و ديما خليك الأولوية و أوعى تدخل فى سكة الغلط برجليك بحجة أنك بتجارى حد تانى عشان متخسروش لا ! أخسروا و متخسرش نفسك ! و كمان الإذاء النفسى ، متخليش أى حدد يشكك فى نفسك ، يقلل منك ، يحسسك أنك ضعيف أو قيمتك قليلة مهما حصل ! مش معنى حتى أنك عملت حاجة غلط يبئى الهو ذل و يمسكك من أيدك البتوجعك ! لا أحنا ، بنى ادم ، خطائين و ربنا البيحاسب مش البشر… متخليش حد يستغل نقط ضعفك ، الحياة بتكمل مهما حصل…حب نفسك و لازم تتأكد أن أهم حاجة أى علاقة تتطور و تحسن منك مش ترجعك ١٠٠ خطوة لورا
٤)كره الخير ليك
شخص بيبئى مغرور ، مبيحبش غير نفسه و بس ، نوعا ما نرجسى ، و ميحبش تكون أحسن منه ، بيكرهلك الخير ، حقود و غيور و يبئى بيمووت لو طلعت أحسن منه فى أى حاجة ، شايف أنه كامل مع إن الكمال لله وحده ! ده ممكن يعطلك ، يقنعك بحجات مش حقيقة و توصل لمرحلة أنه يبوظلك البتعمله عشان متكملش ، عايزك محلك سر ، متتقدمش خطوة لقدام ، و ديما عايز يكون الأفضل ! لا مش سباق هو ! العلاقة الصح تقوم على التشجيع و الدعم و تدفعك للأمام و للأفضل و تلائى نفسك مبسوط نسبيا و حياتك بئت أحسن ! مينفعش تكون مع حد مبدئه نفسى و الطوفان لأنك هتغرق فى الطوفان ده فى الأخر
٥)أنك تدى تدى تدى و متخدش حاجة خالص
تدى صدق و أمانة و تشجيع و تحفيز ، تدى طاقة ، تدى كل حاجة جواك و القدامك مش بيعمل حرفيا أى حاجة ، عمال ياخد ياخد و يستغلك و يبتذلك و أنت مبسوط و مكمل ، أحب أقلك أن هيجى يوم و طاقتك هتخلص و مش هتقدر تدى تانى و أول ما هيحصل كدة ، صدقنى ، هيجى الشخص التانى ده هو اليبيعك ، مصلحته خلصت ! هو متعود ياخد و ميديش أما هيتحط فى موقف أنك لازم تدى لا أمشى أحسن ، أشخاص سلبية كدة ! مينفعش نكون فى علاقة حد هو البيبذل مجهود و التانى لا ! حد بيضحى و حد لا ! بجد مينفعش…أنت كدة بتئذى نفسك و بتموتها و بتسمح لحد تانى أنه يستغلك ، مال بئة أو مصلحة أو حتة من غير مصلحة ، بتخلص كل حاجة حلوة جواك و طاقتك على حد ميستهلش ، و الطاقة مخزون لو خلصت مبيرجعش تانى و مبتحسش بيه غير أما ينتهى ! هو اه كل علاقة و ليعا سببها بس مش الاستغلال خالص
٦)اليوعد و ميوفيش
مية كلمة و كلمة و فعل مفيش ، هروح و أعمل ووهسوى و مفيش حاجة خالص ، كداب و الكدب فى دمه و ميعرفش يوفى بوعده ، ده حد شخصيته كدا ، و لو قعدت ١٠٠ سنه جنبه مش هيتغير ، و بجد ده ليه تأثير سئ على القدامه ، بيخليه يحس أنه قليل و ملوش قيمة ، يحس بالخذلان و عدم الثقة ، ده لو دخل علاقة ، يبئى خلاص منتهية
٧)الشك
حاجة بنسمعها كتيير بس مش فهمنها ! بس مش لازم شك فيك أنك على علاقة تانية لا ، ممكن شك فى مشاعرك ذات نفسها ، شك فى نواياك ، شك فى حبك ليه ، ديما ظنه سئ ، هو غالبا بيكون شاكك حتة فى نفسه ، و بيوصلك لمرحلة أنه يشككك فى نفسك ، يحسسك أنك فيك حاجة غلط ! اليحسسك الإحساس ده يتواجهه و تلاقوا حل يا بلاها أحسن
٨)الوخدك شفا لجراحه
دى بئة تخص العلاقات العاطفية بالذات ، يبئى خارج من علاقة بقاله أسبوع ولا شهر و يلا ، ملحقش يداوى جروحه أو يراجع نفسه و يفهم الحصل ، واخدك بئة أنتقام من الطرف الأخر ، غيظ ليه ، ميكنش لوحده و خلاص ، يا عينى ي/تصعب عليك / عليكى ، و تفضل تحاول معاه و تشفى فى جراحه و فى الأخر ، أحنا مش نافعين مع بعض 🙂 لا ، الحقيقة فى دكترة متخصصة للموضوع ، ده مش دورنا خالصص بصراحة ، أحنا ممكن نساعد بس مش ده دورنا الأساسى ! و مفيش حاجة اسمها انساه أو انساها بحد تانى و هحبه مع الوقت ، أنت بتضحك على نفسك
٩)بين علامين
هو اه أختلافنا سر قوتنا بس مينفعش يكون طرف من الشرق و طرف تانى من الغرب ،مينفعش ، لازم يكون فى أرض تجمعكوا فى النص ، حاجات مشتركة ، أراء و قناعات مشتركة ، مش شرط المستوى الأجتماعى بس المهم المستوى الفكرى و الثقافى و التعليمى ، عشان محدش يحس أنه أقل من التانى ، هتكونوا زى الواقفين على جزيرتين و ما بينهم المحيط و بينادوا على بعض
١٠)المفيش حاجة بترضيه
ديما بيحسسك أنك مأثر و مش مديه حقه ، ديما بيحسسك أنه فى أحسن منك و أنه متنازل عشان معاك ، ديما بيقارن بينك و بين الناس ، النوع ده من أسوء الأنواع بجد و لو عملت ال ما لا يعمل برده مش هترضيه
طبعا فى علامات تانية كتير تخليك تعرف العلاقة سامة ولا لا بس أهم حاجة جواك يبئى مرتاح و مطمن و مش مخدوع لأن فى فرق !!! لو فعلا ده موجود و مفيش شك واحد فى المية فى العلاقة دى ، تبئى علاقة سليمة بنسبة كبيرة .أخر حاجة حابة أقلها أحنا عاملين زى الكباية ، تخيل حطيت فيها شاى وراه قهوة و راه عصير…ألخ ! كل ما هتدخل ناس غلط ، كل ما هيسيبوا أثر و علامة صعب نمحيها و هيبأى ليها تأثير علينا بعد كدة ، مشاعرنا و طاقتنا دى حاجة كدة ثمينة جدا ، متديهاش لأى حد إلا لما تتأكد أنه يستاهل بجد و يكون أثبتلك ده عشان متندمش فى الأخر !و حب نفسك لأن لو محبتش نفسك و خاليتها الأولولية عمرك ما هتعرف تحب حد تانى !