Portraits of the victims of the Port Said Stadium are seen as Supporters of Egypt's Al-Ahly football club gather in Mokhtar El-Tetsh Stadium in Cairo, on February 1, 2014, to mark the second anniversary of the deadly riot. Clashes between fans of homeside Al-Masry club and Cairo's Al-Ahly erupted at the final whistle in Port Said, that left more than 70 people dead in February 1, 2012. AFP PHOTO/MOHAMED EL-SHAHED (Photo by MOHAMED EL-SHAHED / AFP)

التعصب الكروى: اشكاله و 4 حوادث له

الساحرة المستديرة ، كلمتين بنوصف بيهم كرة القدم ، الفعلا بتسحر ملايين من المشجعين بس كل حاجة لها الوسط و الحد الادنى ولها الحد الأقصى ، الحد الأقصى الممكن يؤدي لمشاكل كبيرة و كوارث حقيقية و الناس البتعاني من ده بيرفضوا حتى يسمعوا أو يشوفوا و لو جزء صغير من الحقيقة ٠

مبدئيا كده ، ايه هو التعصب الكروى ؟

لو كتبت فى جوجل التعصب الكروى هيطلعلك إن التعصب الكروى هو سلوك عنيف المشجعون يقومون به فى الملعب و اسمه بالانجليزى٠

(Football Hooliganism)

طيب هل يا ترا هو ده بس التعصب الكروى ؟

التعصب الكروى لو فكرنا فيه بعمق شوية هو أكبر من كدا بكتير ، ده بقى جزء من الحياة اليومية لاغلبنا دلوقتى و كتير مش مستوعبين أبعاده٠

أشكال التعصب الكروى فى حياتنا اليومية

حرفيا بعض الاشخاص الكرة بالنسبالهم حياة أو موت ، اللي بيغلط فى الفريق اللي بيشجعه بالنسباله أكبر من اللي يغلط فيه هو شخصيا ، فى ناس بتخسر بعضها و ساعات بتحصل خلافات بين الأزواج لو ال٢ متعصبين و بيشجعوا فرق مختلفة٠

ممكن حد يأجل أو يقصر فى شغله أو مذكرته أو أى حاجة مهمة وراه عشان بس يتفرج على الماتش٠

ده غير كمان إن الكرة أحيانا بتتحكم فى مزاج بعض الناس ، لو فريقهم كسب بيبقى كأنهم كسبوا الدنيا و ما فيها و لو فريقهم خسر بيحسوا إنها نهاية العالم ، مع إن لو الفريق البتشجعه كسب أو خسر ، ده مش هيقصر على حياتك بأى شكل من الأشكال٠

المضحك فى الموضوع إن اللعيبة ذات نفسها بتتنقل من نادى للتانى عادى جدا لمجرد إن النادى التانى هيدفع أكتر و لعيبة الفريق المنافس بيكونوا أصحابهم أصلا ، و البتيحرق دمه فى الموضوع ده كله هو المشاهد المتعصب كرويا٠

ده غير الاخطار الصحية البتنتج عن التوتر و الضغط العصبى اللى الشخص بيتعرضلهم بسبب التوتر و هو بيتفرج على الماتش ، و ياما شوفنا مشاهد عنف غريبة بتنتج عن التعصب الكروى زى تيليفيزيونات بتتكسر ، إصابات بسبب خناقات كبيرة بتقوم فى قهاوى / كافيهات / و طبعا الشغب البيحصل فى ملاعب الكرة اللى أحيانا بتؤدى إن يبقى فى خسائر فى الأرواح ٠

أبرز الحوادث المعروفة اللى نتجت عن التعصب الكروى على مر التاريخ

حادثة بيرو سنة ١٩٦٤

الحادثة دى سجلت أكبر عدد وفيات على مر التاريخ ناتجة عن التعصب الكروى ، حصلت يوم ٢٤ مايو سنة ١٩٦٤ أثناء ماتش كان بين بيرو و الأرجنتين، أقتحم وقتها مشجعون نادى بيرو بهمجية شديدة الملعب فقوات الأمن رشت غاز مسيل للدموع و أدى لفقد ٣٢٧ روح بسبب الاختناق و التدافع الشديد٠

حادثة ملعب هيسل سنة ١٩٨٥

يوم ٢٩ مايو سنة ١٩٨٥ حصلت حادثة مريعة فى ملعب هيسل فى بروكسل أثناء مباراه كانت بين نادى يوفنتوس الإيطالى و نادى ليفربول الإنجليزى ،حصل أنهيار لجدار فى الملعب بسبب إن ناس كتير كانت بتحاول تهرب فى وقت واحد من شدة أعمال الشغب الحصلت أثناء الماتش أدت إلى أن يكون فى ٣٩ قتيل و ٦٠٠ مصابون٠

مذبحة بورسعيد سنة ٢٠١٢

أكبر و أعنف حادثة فى تاريخ الكرة المصرية الراح ضحيتها ٧٢ روح و مئات المصابين يوم ١ فبريار سنة ٢٠١٢ ، المبارة كانت ما بين النادى الأهلى و نادى المصرى ، الحادثة بدأت بنزول بعض المشجعون لارضية الملعب و لعيبة النادى الأهلى كانوا فى مرحلة التسخين و أقتحم عشرات المشجعين الملعب ما بين الشوطين بس الكارثة الحقيقة حصلت لما فاز النادى المصرى على النادى الأهلى ، فاقتحم مشجعين لنادى المصرى الملعب و كان معاهم أسلحة بيضة و عصيان و حصلت المذبحة لجماهير النادى الأهلى٠

حادثة إندونيسا سنة ٢٠٢٢

شعوب القارة الأسيوية عموما مش من الشعوب العندها نسب عالية من التعصب الكروى فالحادثة دى كانت الأولى من نوعها التحصل فى ملعب من الملاعب الآسيوية ، راح ضحيتها ١٢٥ روح و أصيب ٣٢٠ ، كان فى ماتش بين فريقى أريما و بيرسيبايا سورابايا يوم ٢ أكتوبر سنة ٢٠٢٢ ، و زى ما حصل فى الحوادث السابقة ، حصل هجوم من بعض المشجعين و أقتحام للملعب الكانت بتحصل فيه المباراه فأطلقت قوات الأمن غاز مسيل للدموع و ده أدى لحدوث الكارثة دى بسبب برده التدافع و الاختناق٠

فكرة إنك يكون عندك فريق مفضل بتحبه و بتشجعه بروح رياضية ده مش غلط إطلاقا ، لكن الموضوع لما بيزيد عن حده بيأثر عليك و على أعصابك سلبيا و حرفيا بتوقف حياتك مهما كان وراك حاجات مهمة عشان تتفرج على الماتش و مبتبقاش مدرك إن الموضوع مش مجرد لعبة بتتلعب فى ملعب ،ده فى ناس بتحقق مكاسب فلكية بالملايين من ورا اللهفة الشديدة فى متابعة الماتش و حرقة الدم البتتعرضلها وقتها ، ده غير إن أحيانا تتداخل فى الأمر بعض العوامل السياسية و فى الآخر المتضرر الحقيقى من كل ده هم البيعانوا من التعصب الكروى فحاول متكونش واحد منهم٠

Leave a Reply

%d bloggers like this: