أسباب تخليك تشوف مسلسل بطلوع الروح لو مكنتش لسه شفته

السنة دي عكس السنة اللي فاتت مشوفناش مسلسلات كتير 15 حلقه مع أن الموضوع ده اثبت نجاحه جدا بس مفيش مسلسلات كتير تحمسوا للموضوع ده السنة دي غير مسلسلين ”مين قال“ اللي تم عرضه في أول 15 يوم من شهر رمضان الكريم و مسلسل ”بطلوع الروح“ اللي كمل بعد النجاح الكبير ل “مين قال”. بطلوع الروح حصل عليه انتقادات كتيرة من ساعة ما نزل الإعلان و الآراء اختلفت عليه بين أنهم مش عايزين النوعيه ديه من المسلسلات وناس تانيه شافوا اختلاف المسلسل و أننا ممكن نحكم عليه بعد ما نشوفه و ده اللي أثبته المسلسل أثناء عرضه المسلسل يضم ممثلين كبار شاطرين جدا وهو من إخراج كاملة أبو ذكري

١- كاملة أبو ذكري

كاملة أبو ذكري مخرجة كبيرة اوي وكل اعملها في آخر كام سنة كانت بتنجح بشكل مش طبيعي زي ب١٠٠ وش، سجن النسا، بنت اسمها ذات…الخ

ده غير ان ده تانى عمل يجمعها مع منه شلبي بعد “واحة الغروب” اللي كان مبهر جدا من كل النواحي الإخراجية ماعدا حاجة واحدة بس ان احداثه كانت بطيئه جدا وهو ده اللي خله المسلسل ميوصلش لكل الناس

٢- ١٥ حلقه بس

إختيار ان المسلسل يبقي ١٥ حلقة ده كان من أحسن الإختيارات اللى تعملت حقيقي منها تفادوا المط في الأحداث علشان يكملوا ٣٠ حلقة ومنها خلقوا حالة من التشويق عند الجمهور خليته متأكد ان و هو مستني الحلقة الجديدة ان هيكون فيها مشاهد مهمه و أحداث مهمة مش تكملة و بس

٣- منه شلبي

كلنا بنستنى منه شلبي نشوفها في أي عمل نظرا لأنها كل مرة بتثبت للجمهور إنها قد المهنة وفي كل مرة بتتفوق علي نفسها فيه و كمان وصلت لمرحله في سن صغير صعب حد يوصلها و ده من خلال أنها فازت بجائزة فاتن حمامة التقديرية و كمان تم ترشيحها كأول ممثلة عربية لجائزه ال Emmy

و ترجع منه شلبي للدراما مرة أخرى بعد نجاح مسلسل “ليه لاء” الجزء التاني الي ناقشت من خلاله فكرة مهمة بتدور حول تبني الأطفال من دار الأيتام كمان شوفناها في آخر عمل لها في فيلم كوميدي “من أجل زيكو” والي شاركت في بطولته مع كريم محمود عبد العزيز والي حقق نجاح كبير في صالات السينما

و نقدر نشوفها حاليا في مسلسل “بطلوع الروح” في دور روح الي قدرت انها تجسده بشكل رائع وأدت الشخصية بإتقان شديد و قدرت أنها تدخلنا في مود الأحداث معاها

٤- محمد حاتم

ممثل موهوب جدا وأدواره متنوعه وقدر خلال الفتره الي فاتت أنه يثبت وجوده في الساحة الدرامية وشفنا نجاحه في مسلسل “أبو العروسه” خلال التالت الجزاء الي تم عرضهم و اخر حاجه شفناه فيه و عَلِم معانا كمان و أدى فيه أداء هائل كان دوره في مسلسل”منوره بأهلها” الي شاركه في البطولة ليلي علوي و باسم سمرة و احمد صالح السعدني و غاده عادل و قدر محمد حاتم أنه يثبت نفسه ويتفوق في تجسيد الشخصية وخالنا شويه نكرهه وشويه نحبه ونتعاطف معاه

بنشوفه في مسلسل “بطلوع الروح” في شخصية أكرم الشاب الي كان متفتح وتفكيره أشبه بالتفكير الأوروبي و اللي بعد كده انضم للجماعات الإرهابية من خلال تأثير صاحبه عليه و الي خلاه ياخذ زوجته وابنه لبلاد الرقة

٥- احمد صلاح السعدني

السنه الي فاتت شارك الممثلة زينة في مسلسل كله بالحب ولكنه اعتذر عن المسلسل و انسحب منه لبعض الخالفات و كنا شفناه في مسلسل “منوره بأهلها” اللي قام فيه بدور وكيل نيابة يحقق في جريمة قتل و شفنا تمثيله اللي كالعادة كان متوقع

في رمضان 2022 بنشوفه في شخصية عمر اللي كان شاب جامعي وحب روح لكنها رفضته نظراً لحبها لأكرم اللي اتجوزته و خلفت منه إلى أن يظهر عمر في حياة أكرم عشان يقنعه بالدولة الارهابية و السفر للرقه عشان الجهاد إلا أننا مع تطور الأحداثة بنعرف أن السبب الأساسى فى كل ده هو حبه لمنه شلبي ف قادر يعمل الشخصية بشكل موهوب ومتميز 

٦- الممثلين العرب

كمان المسلسل بيضم العديد من الممثلين العرب في بنشوف ممثلين من العراق و سوريا و لبنان و فلسطين و المغرب و الأردن و كتير من النقاد أكدوا أن وجود الممثلين العرب في العمل ادى إلي ظهور العمل بشكل مميز ومختلف عن الأعمال الموجودة في الساحة الرمضانية

بنشوف الممثلة دياموند عبود في المسلسل وهي ممثلة لبنانية حصلت علي جائزه افضل ممثله في مهرجان القاهرة السينمائي لعام 2017 عن دورها في فيلم “في سوريا” بالإضافة أنها كانت من أحد أعضاء التحكيم بالمهرجان لسنه 2018 و كمان اخر حاجه شاركت فيها كانت مع منى زكي و إياد نصار في فيلم “أصحاب و لا أعز” و اللي كان واجه نقد كبير من الجمهور وبنشوفها حاليا في مسلسل بطلوع الروح اللي طالعه فيه بتساند منه شلبي للهروب من الرقة 

وكمان الممثل اللبناني عادل كرم الي ظهر في حلقة رقم 11 في مشهد واحد وهو يؤدي دور صحفي فلسطيني يغطي الاحداث في الرقة في شخصية نور


written by:

Shapinam Abdelfattah & Ayat Mahmoud

Leave a Reply

Your email address will not be published.

%d bloggers like this: