كان ليا صديقه وكانت مقربه جدا جدا ليا لحد ما حصل موقف ما انقطعت العلاقة مبقاش حد يعرف عن التاني أي حاجه ل هي سألت ولا انا سألت،بس بعد اخر مكالمه بينا كنت لسه بدخل عند رسايلنا علشان اكتبلها الصبح “صباح الخير” ولما كان بيحصلي موقف مضحك او محزن كنت بدخل علشان اكتبلها واقولها :شوفتي الي حصل،وبعد ما بكتب بمسح كل الي كتبته وباليل بدخل اكتبلها “تصبحي علي خير” وافتكر ان بقالنا اكتر من سنه محدش عارف عن التاني اي حاجه بس مجرد اني متعوده اشاركها اليحصل والي دار في اليوم كنت ممكن ادخل اعمل ريكورد واكتب كلام كتير وبعدها افتكر ف أمسحه فضلت علي الحال دة السنه كلها
لحد ما قلت انا همسح رقمها من عندي عشان مدخلش احكيلها واكسر عندي فكرة الاعتياد علي وجودها معايا وهي مش موجودة لاقيت نفسي بعد ما مسحت الرقم بدخل علي السوشيال ميديا منتظرة منها رساله او مستنياها تنزل البوست الي الاقيها فيه بقت احسن بعد الي حصل ما بينا، عارفين كل دة بيرجع ل ايه؟ للاعتياد . اعتيادنا الدائم علي وجود الناس حوالينا،اعتيادنا علي المكان الي عشنا فيه، اعتدنا علي كل حاجه حوالينا لحد ما وصل بينا الأمر اننا نظبط عقلنا وفكرنا ومشاعرنا علي شئ محدد ليس قال للتغيير او التعديل. التعود او الاعتياد سلوك غير ارادي سلوك احنا بنعمله ومن غير ما نحس نلاقيه اتملكنا،تفتكروا ايه معني “الاعتياد”؟؟؟
الاعتياد هو حلة التأقلم التدريجي مع ظروف بيئيه معينه او علي أشخاص معينه او علي فعل حاجه زي الادمان سواء كان للمواد المخدرة او للسجاير انت اتعودت عليهم فعينك مشافتش غير التعود علي شربها مشافتش الاضرار
التعود علي الاشخاص حاجه حلوة انك تتعود علي وجود اهلك وتعودهم علي وجودك جنبهم من وقت للتاني بس الي مش ظريف انك متعودش نفسك علي يوم هما مش هيبقوا فيه معاك نفس الكلام مع الاصدقاء وعلاقاتنا في المستقبل كل ما بمشي اكتر واتعرف علي ناس اكتر بشوف عندهم بعض الجوانب المظلمه والي بسببها هو التعود مش حاجه تانيه، بقيت بشوف ان فيه ناس بيوصلوا لمرحله التعود ومن بعده التملك، ودة الي بيسبب المشكله مثلا انت متعود ان الي قدامك كل يوم بيقولك صباح الخير وهو مبسوط وعلي وشه الابتسامه متعود انه يقولك احكي واشكي انا سامعك لحد ما بييجي يوم بيبقي فيه ضغط فيه توتر ف الي كان بيقولك صباح الخير بابتسامه قالها بطريقه جافه او ممكن ميبقاش قالها وشويه شويه لقاك مضايق مجاش وقالك مالك ولا قالي انا سامعك هنا عقلك بيبدء يقولك مش دة الي انت اتعودت عليه انت اتعودت علي الطبطبه اذا الي قدامك اتغير يبدء عقلك من كتر التعود الي بقي فيه يوضحلك اد ايه الشخص اتغير ومبقاش زي الاول في حين انه لا هو متغيرش هو بس بيمر ببعض المشاكل مفيهاش حاجه لواستنيت عليه اوانت الي تقوله مالك يا عزيزي احكي واشكي انا سامعك. سيناريو التعود بيتعاد مع فقدانا لشخص عزيز علي قلبنا سواء هو الي اختار البعد او كان عمر ومكتوب بنلاقي نفسنا فاكرين الذكريات والرغي الكتير باليل والسهروالخروج وبنلاقي نفسنا رايحين نركب العربيه عشان نروح المكان الي كان بيجمعنا، بيبقي عندنا وفاء للحكايات والاماكن اكتر من وفائنا للشخص ذات نفسه. التعود بيبقي اوجع من الحب في حالات كتيرة جدا انت لو حبيت مع الوقت هتنسي
اما لو اتعودت صعب انك تعدي وتنسي. بتمني اننا نتعود بس ب اعتدال ونحب بردو ب اعتدال علشان منجيش ننكسر ونقول بسبب الي حوالينا، عارفه ان الاعتياد والتعود جزء لا يتجزء بيسيطر علينا وبننقاد ليه، بس لازم نتعود بحكمه، مش غلط انك تتعود بس الغلط انك تبرمج حياتك علي عادة واحدة غير قابله للتغيير ولا التعديل لازم يبقي عندنا يقين اننا انهاردة او بكرة او بعد سنه هنودع بيتنا ونعيش في مكان تاني هنودع وظيفتنا ونشتغل في مكان تاني بمكانه احسن او بنفس المكانه، لازم يبقي عندنا يقين ان الاشخاص هيجيلهم وقت يمشوا وهيجيلهم وقت ويتغيروا زي ما انت ما بتتغير لازم نتعلم نبقي اوفياء لصحابنا واهلنا مش اوفياء لعاداتنا وذكرياتنا ورغينا
كتابه: ايات محمود