الموبايل بقى جزء لا يتجزأ من يومنا ، الموبايلات تسللت لحياتنا بسرعة مخيفة ، و ياااه لو النت فصل ، ملل و زهق و عصبية كأننا خلاص مش هنقدر نعيش من غيره ، حرفيا بقى إدمان و بقينا محتاجين ديجيتال ديتوكس منه٠
و مع إن التكنولوجيا لها فوائد عديدة و زودت الوعى لحاجات كتير لكن تأثيرها السلبي قوى ، خبر وحش مثلا يقلبلك يومك كله ، و للاسف ٩٠% من اللى على السوشيال ميديا هو الجانب السعيد من الحياة مش الحقيقة ، و بتدخلك في حالة مقارنة مش مقصودة و تحس إنك متأخر جدا عن باقى الناس ! وعشان كدة النهاردة هنتكلم عن موضوع مهم جدا و هو ازاى تفصل ؟! ازاى تعمل ديجيتال ديتوكس ؟
مبدئيا ليه اصلا ممكن نحتاج الديجيتال ديتوكس ؟
ببساطة لأن أضرار الموبايل لا تنتهى ، من أضرار جسدية زى ضعف النظر و وجع الرقبة والظهر لأضرار السوشيال ميديا النفسية و التوحد البقى موجود ، حتى لما بنتجمع ، بيبقى كل واحد على موبايله و مفيش تواصل ، وكمان ضعف الإنتاجية الكبير و قلة التركيز و تضييع الوقت اللى بيؤثر على مذاكرتك أو شغلك أو حتى أجازتك الكلها بتضيع من غير ما تنمى من نفسك و مهاراتك٠
طيب لما أعمل الديجيتال ديتوكس
ايه اللى هيحصل ؟
كتير من اللى عملوا الديجيتال ديتوكس قبل كدة لاحظوا أن إنتاجيتهم فعلا بتعلى و بيبقوا مبدعين أكتر خصوصا اللى شغلهم له علاقة بالتصور و التخيل و الفن و حتى اللى شغلهم مكتبى بقوا مركزين أكتر و صفاء الذهن عموما بيعلى جدا ده غير كمان إن كتير من الناس اللى كان عندها مشاكل فى النوم ، لما بدأوا يفصلوا عن الموبايل من ساعة لساعتين قبل النوم ، نومهم أتحسن جدا و الأرق قل كتير٠
! نيجى بقى للمهم
هنعمل الديجيتال ديتوكس إزاى ؟
الديجيتال ديتوكس مش معناه إطلاقا إنك هتمنع نفسك من التكنولوجيا ، فى كتير مننا شغله اصلا عليها !لكن الفكرة فى إنك تقلل و توصل للتوازن فى الاستخدام اللى ميأثرش بالسلب على حياتك
-:طرق ل الديجيتال ديتوكس
١-الحدود
إنك تحط حدود للاستخدام زى إنك تحدد أوقات “سكرين فرى” تكون بعيد فيها عن الموبايل تماما زى وقت الوجابات أو قبل النوم و ممكن كمان تحدد أماكن فى بيتك تكون “ديجيتال فرى” و يكون موبايلك بعيد عنك تماما و تعمل حاجة تانية بعيدة عن الشاشات٠
٢-ممارسة نشاطات بعيدة عن التكنولوجيا
دخل فى حياتك رياضة معينة حتى لو مشى أو جرى لمدة نص ساعة مثلا أو حتى تأمل أو يوجا ، هتخرج الطاقة السلبية من جسمك و هتكون صحى اكتر ، ممكن هواية من الهوايات النسيتها مع مشاغل الحياة زى الرسم أو الموسيقى أو أى حاجة حرفيا تشغل فيها دماغك حتى لو الأعمال المنزلية زى المواعين مثلا ، بس بشرط ! تبعد عن الموبايل تماما فى التوقيت ده و متخليش مكالمة أو أى رسالة تقطع النص ساعة دي ٠
٣-المتابعة
أنت رقيب نفسك ، لما تحس نفسك الساعات جريت بك و مأنجزتش الوراك أو مودك بدأ يقلب بسبب كتر الاخبار السلبية ، وقف فورا ! و تعمل أى حاجة بعيدة عن الموبايل ! و دلوقتى الموبايلات بقى فيها خاصية إنك تشوف كل تطبيق بتستعمله لمدة قد ايه ، أكتر تطبيق بيضيع وقتك قبل ما تفتحه تكون عامل تايمر على الموبايل و لما يرن تبعد التليفون عنك عشان الوقت ميضعش منك ٠
٤-ألجأ ل التكنولوجيا
ازاى ألجأ ل التكنولوجيا و أنا ببعد عنها ؟!ببساطة فى تطبيقات كتير دلوقتى بتساعد على الديجيتال ديتوكس زى فريدوم ، فليبيد و مومينت اللى بيساعدوا على تقليل استخدام تطبيقات السوشيال ميديا و فى كمان فوريست و برومودو تايمر و كتكوتى اللى بتساعدك و بتشجعك على إنجاز مهامك و تنظيم وقتك و فى غيرهم كتير٠
و فى الاخر هنقول لك شوية حاجات تساعدك
١-اشحن تليفونك خارج اوضتك ، حاول تستغل فرصة إن الموبايل بيتشحن و أبعد عنه ، حتى تحافظ على بطارية الموبايل
٢-الموضوع مش قفش ، ابدأ بفترات قصيرة ، ربع ساعة مثلا ، وبعدين زود واحدة واحدة فترة الديجيتال ديتوكس لحد ما توصل لساعتين
٣-أقفل الإشعارات
(notifications)
، حتى لو فى فترة الديجيتال ديتوكس بس عشان ميحصلش تشتت و الموبايل يسرقك فى أى لحظة و توقف الديتوكس
٤-حاول تشجع صحابك على الموضوع و تكونوا مع بعض ، لما كل واحد هيشجع التانيين ده هيفرق كتير
٥- أعمل يوم فى الاسبوع يكون فى تفاعل اجتماعى ، خروجة مع أصحابك أو أى نشاط إجتماعى هيخليك تتعامل مع كذا شخص ، بس مش شغل ولا دراسة و مفيهوش قاعدة و وقت فاضى كتير أو يكون فى ضغط ، ده هيساعدك كتير انك تنمي مهاراتك الاجتماعية و هتكون بعيد عن التكنولوجيا بوجه عام طول الوقت ده و فى نفس الوقت عملت حاجة جديدة
و بكدة نكون ادينالك فكرة عن الديجيتل ديتوكس و بنشجعك إنك تجربه و تبدأ رحلة تتواصل فيها مع نفسك و تكتشف نفسك أكتر ، هيفرق معاك كتير ٠٠٠