ليه لازم تتفرجوا على بيمبو

مع ان اسمي بيمبو ،بس  أنا مش بسكوتة ،  مش بتكسر خالص ، أنا مش إزازة صودة


دى الكلمات اللي بدأ بيها تتر مسلسل حقيقى مختلف و جاذب للنظر من كل النواحى كتصوير ، إخراج و تمثيل.
قبل ما نتكلم عن المسلسل حبينا نبدى إعجابنا بأغنية تتر البداية “عندى كتير” لأبو الأنوار و ليل بابا و كمان الموسيقى التصويرية الهم الاتنين ريمكس رهيب لاغنية تسعيناتى قديمة كدة لهشام عباس بس عند جيل التسعنيات دى شلال

ذكريات ، أغنية “شوفى”.
مسلسل بيبمبو هو مسلسل شبابى من تمن حلقات يعنى تخلصوا فى قاعدة. مش زى المسلسلات العربى التقليدية ، ميكس كدة بين الكوميدى و الأكشن و الرومانسى و الغامض.مش من النوع الممل إطلاقا ، كل حلقة فيها مفاجئات جديدة بتبهرنا و بتشوقنا للحلقة الجاية.
فى ستايل تسعيناتى للمسلسل كدة مخليه مختلف و غريب ، هيبقى مبهر للجيل الحالى و نوستالجيا لجيل التسعينات ، هو مش بيحكى عن حقبة التسعينات ، بس فى فيبس تسعيناتى ، اللبس ، الاغانى ، الاكسسوارات ، حتى بعض الشخصيات مسمينها على اسامى بسكوت كانت مشهورة جدا فى وقت التسعينات .أعضاء الكشك الكرام ، بيمبو و شمعدان و كتاكيتو(اللي مش من الأعضاء حاليا).


باختصار المسلسل بيبدأ ب بيمبو اللي بيشتغل ديلار و عنده ذكاء شديد و حاد ملفت للنظر ، هيقع فى مشكلة كبيرة و هيقابل جابر الصعيدى اللي هيساعده فى حل المشكلة دى فى لقاء ملحمى تاريخى الحقيقة ، و بعدين هتطلب منه لانا المساعدة فى حوار يخص صاحبتها مريم المختفية و في اول حلقة على طول بيحصل حدث كبير بيغير في المسلسل و بيخلي بيمبو يبدأ رحلته في البحث عن مريم و حاجات تانية كتير! و المسلسل عموما مليان بلوت تويستس كتير و نهايته كانت مفتوحة و إستثنائية فنتمنى من كل قلبنا أن يتعمل منه جزء تانى.


بس المسلسل فى جانب لازم نذكره ، أن البطل ، اللي هو بيبمو مش شخصية تقليدية ممكن نلاقيها فى ناس كتير .
هو شخص نفسة تايهة منه و مش لاقيها ، متلخبط ، بيضبش ، فالمسلسل بيوضح جانب فى البنى ادم كدة مش دايما بنحب نتكلم عنه ، الجانب اللي مش عارف هو مين ولا هو عايز ايه فى الحياة ، و على مدار أحداث المسلسل هنعرف ازاى كل اللخبطة اللي حصلت فى حياته فجأة كدة هتساعده يكتشف نفسه. ساعات إحنا فعلا مش بنعرف إحنا مين إلا بعد ما العواصف اللي في حياتنا بتهدأ.

المسلسل بطولة أحمد مالك و ويجز و هدى المفتى الكان أدائهم بجد رائع و مميز و حقيقى و معبر و هيكون علامة فى تاريخهم الفنى و هيخليهم يطلعو آلاف الخطوات لقدام.
خصوصا ويجز اللي فاجئنا فى المسلسل أنه مش بس أغانيه مميزة ، لا ، ده عنده موهبة جامدة جدا فى التمثيل
كمان! شاركهم فى التمثيل سليمان عيد و عباس ابو الحسن و حسن مالك و طه دسوقي و سارة عبد الرحمن و سنتيا خليفة و ممثلين تانيين كتيير.

و من تأليف محمد أديب ، وشاركه في كتابة السيناريو والحوار خالد خلة و منة فوزي و ريم الدسوقي وعبد العزيز النجار .هو الأعلى مشاهدة فى مصر على منصة شاهد VIP، إخراج عمرو سلامة و سكريبت الحركة أحمد عزب.

Leave a Reply

Your email address will not be published.

%d bloggers like this: