كتير مننا دلوقتى بقى مدرك مدى أهمية الطب النفسي بشكل كبير وإن الصحة النفسية لا تقل أهمية عن صحة الإنسان الجسدية ، بس فى حاجة بتوقف معظم الناس عن إنهم ياخدوا الخطوة و هي “الاسعار و الوقت” ، احيانا بتكون تكلفة توفير خدمة الطب النفسى عالية و ده بيمنع ناس كتير من اللجوء لها خصوصا بعد الأزمة الاقتصادية اللي بنمر بها دلوقتى و زحمة الحياة اللى احنا عايشنها المش بتوفرلنا الوقت إننا نعمل حاجات كتير ٠
وعشان كدا جبنالكم اسماء ٤ تطبيقات و مواقع اسعارها معقولة ومتوفرة لكم فى أى وقت :-
شيزلج/Shezlong.١
شيزلونج هو من أكبر التطبيقات الموجودة فى منطقة الشرق الأوسط ل الصحة النفسية ، متوافر فيه أكثر من ٢٥٠ معالج نفسي ، بيبدأ سعر الجلسة من ١٥٠ج وتقدر تحدد متوسط سعر الجلسة المناسب لك و أنت بتبحث عن المعالجين ، ده غير كمان انه موفر خدمة انك بترد على عدد من الأسئلة والتطبيق بيرشحلك المعالج المناسب و متوافر فيه برده إختبارات نفسية مختلفة و مقالات كتير عن الصحة النفسية٠
ويصة/Wysa.٢
ويصة هو تطبيق مختلف بشكل كبير ل الصحة النفسية ، بيوفر قدامك نوعين من الخدمة ، ممكن تحجز من خلاله جلسات أونلاين و سعر الجلسة ٣٠٠ج و ممكن تحجز ٤ جلسات في الشهر ب ١١٥٠ج ، أما الخدمة الثانية هي تحديات بتعملها بنفسك عشان توصل لشئ معين زى بناء الثقة بالنفس مثلا بس هو تطبيق معتمد على الإنجليزي مش بالعربى ، التطبيق كمان فى شات بوت لذيذ جدا تقدر تتكلم معاه ، هو أكيد مش زى المعالج النفسى و لكن لو حابب تفضفض هيرد عليك ردود منطقية ممكن تحد من افكارك نوعا ما٠
مينتالتيز/Mentalities.٣
موقع مينتالتيز بيقدم نوع مختلف من خدمات الصحة النفسية ، بيوفر جروب ثيرابى بتكون الجلسات فيه أسبوعية من ١٠ أشخاص و بيكونوا فاتحين الكاميرات ، ده غير كمان انه بيوفر رحلات علاجية بتعيد فيها إكتشاف نفسك و بتحسن حالتك النفسية. مينتالتيز برده بيقدم إختبارات نفسية بتخليك تعرف عن نفسك أكتر و مقالات علمية عن الصحة النفسية. و بيقدم كمان فرص تدريب و تطوع مختلفة للي مهتمين بمجال الشغل فى الطب النفسى٠
سيف سبيس/Safe Space.٤
سيف سبيس ده تطبيق مصرى بيوفرلك مجموعة كبيرة من المعالجين النفسيين بأسعار مختلفة و معقولة عندهم خبرات متنوعة فى الصحة النفسية ، و الميزة فيه إن هوية المستخدم بتفضل مجهولة و محدش بيعرف عنك أى حاجة و قدامك اختيارات فى الجلسات ، ممكن تكون تشات أو مكالمة صوت أو مكالمة فيديو ، الأنت تحبه ، و بيقدم خدمات تانية زى إنك تتكلم مع مستخدم تانى بشكل عشوائى و هوياتكم بتفضل مجهولة عن بعض لو محتاج تتكلم و ممكن تسأل أسئلة و يتم الرد عليك و بيقدم الخدمتين دول ببلاش ، و بيقدم حاجات تانية برده زى اقتباسات يومية تحفزك والتطبيق فيه مدونة بينزل عليها مقالات بتزود الوعى عن الصحة النفسية بشكل كبير٠