١٦حاجة مهم تعرفها لو داخل ثانوية عامة

لو أنت لسة داخل ثانوية عامة جديد يبقى النصايح دى ليك و متخفش مش هنعطلك كتير

 ١- أختار المدرس اللي تفهم منه حتى لو غيرت ١٠٠ مدرس

٢-بلاش تجرب مدرسين فى نفس الوقت ، أدي المدرس فرصة ٣ أو ٤ حصص فهمت كان بها ، مفهمتش غيره

٣-أبعد عن أي مصدر للتوتر أو القلق أو الطاقة السلبية

٤-الهدوء النفسى و التركيز هما مفتاح الإنجاز ؛ فحافظ على نفسيتك على قد ما تقدرعشان التوتر بيعطل دماغك فبلاش منه ، بس خلى بالك ، فى فرق كبيير بين تكبير الدماغ و الهدوء اللي بكلمك عنه ولازم تفرق بين الأتنين كويس.

٥-الأمتحان مابيجيش من برة المنهج عايز حد مذاكر أوي و حالل كتيير و فاهم  و بنك المعرفة ده عشان تفهم منه مش عشان تكون معلومات برة كتاب المدرسة ! (إلا فى اللغات فحل كل يوم تدريب عربى ، متسبهوش)

٦-حل من مصادر مختلفة ، مش لازم تخلص كتاب خارجى واحد و مينفعش تعتمد على تدريب المدرس بس لو عايز تجبب مجموع ، هات كذه كتاب و جمع من كل واحد حبة اسألة ، ده هيعلمك تفكر بطرق مختلفة

٧-مينفعش تذاكر أقل من مادتين فى اليوم ، كدة خطر

٨-بلاش نظام جداول المدرسيين التعجيزية ده ، أنت رتب أولوياتك و حط هدف لليوم حاول تخلصه

٩-الراحة و الترفيه و الخروج مهمين جدا زى المذاكرة بالظبط

١٠-ملكش دعوة بكلام الوزارة و متخليهوش يوترك عشان هيتغير مليون مرة

١١-متدفعش ألافات على ملازم مدرسيين ، هات كتب خارجية للحل أحسن و ذاكر من كتاب المدرسة ، كتاب مدرستك أهم حاجة ، حتى لو مش داخل بيه ، أشتغل منه أحطياتى و ظبطه ، لو كتاب المدرسة سئ جدا فى فكرة حلوة ، أشترى أنت و صحابك الملزمة و وزعوا فلوسها عليكوا و بعدين صوروها

١٢-حاجات الوزارة مبيجيش منها الأمتحان بس أطلع عليها ، هتفيدك ، و لو أنت حد ملتزم ، حل من كتب خارجية و أعتمد عليها فى مادة أو ٢ بس لو أنت مش ملتزم خليك مع مدرس أحسن

١٣-لو عندك فرصة تروح سنتر أفضلك بكتير ، “الأونلاين” ده للعيال الدحيحة اللي بتذاكر أول بأول ، بس أنت محتاج متابعة و أسيستنت يهزقك عشان تذاكر ده لو أنت مش دحيح ، لو أتراكم عليك ٣ حصص أنزل سنتر فورا عشان بالمنظر ده هتفضل لحد ليلة الأمتحان بتتفرج على شرح و تجيب 50% زى تلت تربع الجمهرية

١٤-بلاش مدرسيين البيوت  ، خلى البيت ده أسيستنت مع المدرس الكبيير اللي هتاخد معاه فى السينتر أو أونلاين

١٥-متيأسش من أى مادة و تهملها لأنها مستنياك أخر السنة ، متتوترش و غير مدرسيين كتير لحد ما تفهم و حط فى دماغك هفهمها يعنى هفهمها و حل عليها كتير ، أسعى تجيب فيها أكبر نمرة ممكنة

١٦-بلاش تحدد هدف واحد و هو ده اللي هتموت نفسك عليه ، خد بصة على كل المجالات المتاحة و حدد كذه هدف بمجاميع مختلفة عشان تكون مأمن نفسك

و بالعزيمة و الأصرار و شوية مسئولية بس هتوصل للي أنت عايزه و سيبك من التوتر و الدوشة الحوليك دلوقتى ، كل دفعةبظروفها و إن .شاء الله توصل لبر الأمان

Leave a Reply

%d