بسنت صيام تتحدث عن التمثيل في حرب اهليه و اعمالها المقبله

قللنا اكتر عن نفسك , مين بسنت صيام؟
انا خريجة الجامعة الامريكية. و درست اتصالات تسويقية متكاملة مع انها ملهاش اي علاقة بالتمثيل بس علشان والدي مكنش موافق اني امثل. درست كمان فن وسينما

انتي بنت الممثل أحمد صيام و الممثلة رانيا فتح الله, هل كان صعب انهم يتقبلوا قرارك للتمثيل؟
هما بيشجعوني معنويا بس فعليا لا. يعنى مش هما البيشغلوني و ده بيخليني اتبسط جدًا بكل خطوة باخدها لأن ببقى عارفة انها ١٠٠٪؜ انا. انا اصلا عندي مشكلة ان مش اي دور بحبه فحتى السنة الفاتت رفضت حاجات كتير علشان معجبتنيش فلو كان بابا مكلم حد عشان ياخذني في دور هتكسف اقول ان الدور مش عاجبني مثلًا هيبقى لازم اعمل الدور حتي لو مش عايزة.

قللنا حاجه مفيش حد يعرفها عن ميان السيد و جميلة عوض
مايان و جميلة الاتنين بجد ألذ و أطيب من بعض. عارفة لما تحسي ان حد روحه حلوة دي بجد بتبقي باينة فشكله و فكل تصرفاته هم الاتنين بجد كده. مايان انا قابلتها مرتين أو تلات قبل كده علشان في أصدقاء مشتركين بيننا بس احنا مكناش صحاب خالص لكن لمًا قابلتها في المسلسل مره كانت لطيفة اوي رغم ان ملناش شغل مع بعض بس المسلسل قربنا من بعض. جميله من اول يوم بجد هي كأننا بايتين مع بعض امبارح، بتتكلم معاكي و ترغي. هي ابعد كل البعد عن شخصية تمارا و بجد هي شاطرة اوي ان خلت الناس تكرها اوي في المسلسل.

لو هتدي حد نصيحه هتقوليله ايه؟

مترداش بأقل من ما تستحقه.

هل هنشوفك في أي أعمال تاني قريب؟
ان شاء الله يكون في حاجات قريب. انا لسه بس مش عارفة علشان فرمضان بنبقى مركزين فى حاجات رمضان بس فان شاء الله اول ما رمضان يخلص.

كان ايه احساسك و انت بتمثلي مع يسرا؟
يسرا بجد هي حلم اتحقق لي، أنا حتى في المسرحية عندنا في سينما مصر في الأوبرا بعمل مشهد انتحار كليوباترا بتاعها في فيلم “اسكندريه كمان و كمان”، احنا بنختار مشاهد مصرية من السينما نعملها في المسرحية و عشان أنا بحبها و بحب المشهد ده و الفيلم دا اخترت اني امثله و مكنش فارق معايا يتعرض كل يوم ولا لأ، أنا كان كل آمالي في الحياة أن لما تيجي تلاقيني بعمل مشهد بتاعها بس دا محصلش لسة بس انا عرفتها و احنا بنصور و قلتلها إن أنا بعمل المشهد دا و ساعتها قالت لي: ايه دا ازاي بتعملي المشهد دا، دا صعب اوى’. و هي كانت داعمة اوي و الصراحة اتبسط ان أنا بعمله و هي ادتني ثقة بالنفس كدة من غير ماتحس قالت لي: ‘إنتي شاطرة اوي و عندك حاجه مميزة كمان’ ❤️

إذا كنتِ مكان نانسي كنتِ هتعملي ايه؟
هي نانسي شخصية ساذجة و سلبية اوي و من كتر ما هي بريئة و كدة المشكلة ربكتها. لو اي حد مكان نانسي، لازم ما يبقاش خايف اوي كدة و خاصةً ان لو في نفس موقف بتاع نانسي، عشان هي معملتش حاجة غلط خالص تخاف منها.

مين اكتر حد نفسك تمثلي معاه؟
لا ناس كتيرة اوي اوي اوووي، يعني مثلا: منى زكي، احمد حلمي، كريم عبدالعزيز، هند صبري، د. يحيى الفخرانى طبعًا و ممكن يحصلي حاجة بجد لو موقفتش قدام الأستاذ عادل إمام في لقطه و طبعًا في ناس كتييير جدا جداااا من صحابي انا عايزة امثل معاهم، زي احمد صالح.

احكيلنا عن موقف مضحك حصلك و انتوا بتصوروا
يمكن اكتر حاجة كانت بتضحكني كانت مع سينتيا لما نكون قاعدين و هما بيعملوا تجهيز للمكان و كده و بعدين فجاة تمسكني من يدي مثلاً و تقول حاجة بحماس كده و افتكرها بتكلمني بس هي بكون بتراجع معايا المشهد المشكله انها مبتقوليش قبلها اننا هنعمل بروفة على الكلام فمثلا أنا و هي و جميلة قاعدين وبعدين فجأة تقولي اتاخرتي كده ليه و تمسك ايدي فأنا اقوم مستغرباه

حاجة كمان مشهد ذي المشهد العربيه مع خالد لما بيقولي ان جاب اللاب توب و ان خلاص تمارا مش هتعرف تأذيني تاني المشهد ده انا فضلت قاعدة في عربية تلات ساعات في الشتاء و انا كنت لابسه خفيف. فده حاجة كانت مضحكة اوي لأن انا من كتر ما كنت خلاص تعبانة و منملة و بنام كنت بشوف كل الناس فضاءين.

كتابه: ملك وليد و دان محمد

Leave a Reply

%d